అవునా? కాదా?



లక్ష కోట్లను.. ఒక రెండు నగరాల మధ్య రైలు నడిపించడం కోసం ఖర్చు చేయడం కాకుండా, దేశంలో ఇప్పటికీ కనీస
అవసరాలైన మంచినీరు, విద్యుత్, రోడ్లు లేనటువంటి గ్రామాలకు ఆ కనీస అవసరాలను తీర్చటం కోసం ఖర్చు చేస్తే, ఆ డబ్బు దేశంలోని ఇరవై శాతం మందికి
ఉపయోగపడ్డట్టు కాదా? లేనివాడు ఆకలితో అలమటిస్తుంటే, ఉన్నవాడు తిన్నదరగక ఏడ్చినట్టా?

***

సినిమాల్లో..ప్రతీ పదాన్నీ, దాని అర్దాన్నీ, నానార్దాన్నీ నానా విధాలుగా సెన్సార్ చేసే వ్వవస్థ, టీవీ సీరియల్స్ లో యాద్స్ ల్లో వచ్చే విశృంఖలత్వం పై మాట్లాడదెందుకు? అక్కడ వినపడితేనే మనుషులూ, సమాజమూ ప్రభావితం అవుతుందా? ఇక్కడ చూస్తే, వింటే, ఆ ప్రభావమేమీ ఉండదా? కనీసం సినిమా అంటే, నెలకు ఒకసారో, రెండుసార్లో వెళ్తాం మరి టీవీనో? పొద్దస్తమానం ఆ భరించరాని, చూడలేని యాడ్స్ సంగతేంటి? సినిమా అయితే, ఆ సినిమా కంటెంట్ ని బట్టి, భాగస్వామితోనో, ఫ్రెండ్స్ తోనో, ఒంటరిగానో, జమిలిగానో వెళ్తాం, మరి అందరమూ కలిసి కూర్చొని తింటూనో, కబుర్లు చెప్పుకుంటూనో చూస్తే వాటి దుష్ప్రభావం సమాజం మీద పడదా?

***

ఓటేయడనికి వయసు పరిమితి ఉంటుంది, ఉద్యోగం రావాలంటే, కాలేజీకి వెళ్లాలంటే..అన్నిటికీ పరిమితులూ, అర్హతలూ నిర్ణయించబడ్డాయి...మరి సెల్ ఫోన్ ఉపయోగించడానికీ, ఇంటర్నెట్ వాడకానికీ పరిమితులెందుకు లేవు? ముఖ్యంగా పిల్లల సెల్ ఫోన్ / ఇంటర్నెట్ ఉపయేగంపై ఆక్షలెందుకు లేవు? పిల్లల కోసం సెపరేట్ ఇంటర్నెట్ ఎందుకు లేదు?

***

సార్వత్రిక ఎన్నికలను ఎండాకాలంలోనే పెట్టడం వలన కనీసం ఒక ఐదు వేల కోట్ల రూపాయల పైనే అన్ని పార్టీలు కలిసి ఖర్చు చేస్తున్నాయి, ఎండాకాల వేడినీ, వడదెబ్బనీ తప్పించుకొనేందుకు. ఇటు ఓటర్లకీ, అటు పార్టీలకీ, పార్టీ కార్యకర్తలకూ ఎంత ఉపశమనమో, ఎండాకాలం కాకుండా వేరే టైం లో ఎన్నికలు పెడితే. ఇదెందుకు ఆలోచించరు?

***

కేంద్ర ప్రభుత్వమూ మరియు అన్ని రాష్ట్ర ప్రభుత్వాలు ఒక సంవత్సరం కాలం పాటు వివిధ దినపత్రికలలో, టీవీలలో ఇచ్చే ప్రకటనల ఖర్చులో పది శాతం ఖర్చు చేస్తే, దేశం లోని అన్ని గ్రామాలలో ఒక మంచినీటి బోరింగ్ వేయించవచ్చు. రాకెట్ సైన్సా ఇది అర్దం కాకపోవడానికి?

***

విదేశ వస్తువులు వాడకూడదు, విదేశ యాప్స్ వాడకూడదు, విదేశ సంస్కృతి మంచిది కాదు....మరి విదేశ రాజ్యాంగమెలా గొప్పదయింది? విదేశ డబ్బ్బెందుకు? విదేశ పెట్టుబడులెందుకు? ఈ విదేశీ దిగుమతులకు అనుమతిస్తున్నదెవరు? యధా రాజ తథా ప్రజ కాకూడదా?

***

అన్ని మతాలూ సమానమే, అన్ని భాషలూ, యాసలూ సమానమే. మరి కొన్ని మతాలకే రిజర్వేషన్లూ, అలవెన్సులూ, ఎగ్జెంప్షన్సూ ఎందుకని? కొన్ని భాషలకే ప్రాముఖ్యత ఎందుకని? సర్వ సత్తాక, సామ్యవాద, లౌకిక ప్రజాస్వామ్యంలో ప్రభుత్వ గుర్తింపు లేని బాష/తెగ/మతం లో పుట్టడం తప్పా లేక సర్వ సత్తాక, సామ్యవాద, లౌకిక ప్రజాస్వామ్య దేశం అని చెప్పుకుంటూ కొన్ని భాష/తెగ/మతాలకు ఎక్కువ గుర్తింపూ కొన్నిటికి తక్కువ గుర్తింపూ ఇస్తున్న ప్రభుత్వానిదా తప్పు?

***

అన్ని ప్రభుత్వాలూ ప్రజారంజకం గానే పాలించాయి. అన్ని పార్టీలూ ప్రజాస్వామ్యయుతం గానే నడుచుకున్నాయి. ఎక్కడా అవినీతికి తావు లేదు, అందరూ అభివృద్ధి మీదే దృష్టి పెట్టారు. మరి ఇంకా రోడ్లు లేని గ్రామాలెందుకు ఉన్నాయి? రేషన్ వస్తే గానీ కడుపు నిండని జీవితాలెందుకు ఉన్నాయి? కనీసం మంచి నీళ్లు కూడ దొరకని ఊళ్లెందుకు ఉన్నాయి? ఇప్పటికీ పనికి ఆహార పథకం తో ప్రజల్ని ఆదుకునే దుస్థితి ఎందుకు పోలేదు? అదంతే, అడగొద్దు, అడిగితే నువ్వు దేశద్రోహివి